Зеленский Тоқаевқа алғыс айтты: Украина мен Қазақстан қарым-қатынасы туралы не деді
Ол екі мемлекет арасындағы ынтымақтастықты одан әрі дамытуға мүдделі екенін мәлімдеді
Украина президенті Владимир Зеленский Қазақстан Президенті Қасым-Жомарт Тоқаевқа Украина тәуелсіздігінің 35 жылдығына орай жолдаған құттықтауы үшін алғыс білдірді. Украина басшысы екі ел арасындағы достық байланыстар өзара құрмет пен халықтар арасындағы тарихи қарым-қатынасқа негізделгенін атап өтті, деп хабарлайды NewsMedia.kz.
Зеленский алғыс сөзін жариялады
Владимир Зеленский алғыс хатын X әлеуметтік желісіндегі парақшасында жариялады.
Ол Қасым-Жомарт Тоқаевтың құттықтауы мен жылы тілегін жоғары бағалайтынын жеткізді. Украина президентінің айтуынша, Қазақстан мен Украина арасындағы байланыстардың негізінде өзара құрмет, түсіністік және екі халықты тарихи тұрғыда жақындастыратын байланыстар жатыр.
Украина Қазақстанмен ынтымақтастықты жалғастырмақ
Зеленский екі мемлекет арасындағы ынтымақтастықты одан әрі дамытуға мүдделі екенін мәлімдеді.
Украина Қазақстанмен өзара құрметке, түсіністікке және халықтарымыз арасындағы ежелгі байланыстарға негізделген достық қарым-қатынасты жоғары бағалайды. Біз ынтымақтастығымызды одан әрі нығайтуға ниеттіміз. Сізге табыс, ал достас Қазақстан халқына бейбітшілік, бақ-береке және өркендеу тілеймін, – деп жазды Владимир Зеленский.
Айта кетейік, бұған дейін Қасым-Жомарт Тоқаев Владимир Зеленскийді және Украина халқын ел тәуелсіздігінің 35 жылдығымен құттықтаған болатын.
