Қоғам өкілдері Абылай ханның есіміне «Ұлы» эпитетін бекіту туралы бастама көтерді
Бастама авторының айтуынша, бұл ұсыныс Абылай ханның қазақ мемлекеттілігін нығайтудағы тарихи рөлін мойындаумен байланысты
«Сенімен Болашақ» республикалық қоғамдық бірлестігі Қазақ хандығының билеушісі Абылай ханның есіміне «Ұлы» құрметті эпитетін бекіту туралы бастама көтерді, деп хабарлайды NewsMedia.kz.
Бұл туралы ұйымның ресми үндеуінде айтылған. Бастама ұйым жетекшісі Нұркен Асановтың атынан ұсынылып, бірлестіктің барлық мүшелері тарапынан қолдау тапқан.
Бастама авторының айтуынша, бұл ұсыныс Абылай ханның қазақ мемлекеттілігін нығайтудағы тарихи рөлін мойындаумен байланысты. Үндеуде күрделі саяси кезеңде оның қоғамды біріктіріп, ішкі бірлікті сақтап, Қазақ хандығының саяси дербестігін қорғауға мүмкіндік берген икемді сыртқы саясат жүргізе алғаны атап өтіледі.
Бірлестік өкілдерінің пікірінше, «Ұлы Абылай хан» атауын бекіту – тарихи әділдіктің көрінісі әрі ұлттық мұраға деген қоғамдық құрметтің белгісі болмақ. Сонымен қатар бастама авторлары бұл жеке тұлғаны дәріптеу емес, мемлекет қайраткерінің ел тарихындағы үлесін мойындау екенін атап өтті.
Фото: дереккөз
