Байқоңырдан «Прогресс МС-35» ұшырылды: ХҒС-қа не жеткізеді
Жүк кемесінің Халықаралық ғарыш станциясына дейінгі ұшуы 72 сағат 13 минутқа созылады
16 қыркүйекте Байқоңыр ғарыш айлағынан «Союз-2.1б» зымыран-тасығышы ұшырылды. Ол Халықаралық ғарыш станциясына қажетті жүктерді жеткізетін «Прогресс МС-35» жаңа жүк кемесін орбитаға алып шықты, деп хабарлайды NewsMedia.kz «Роскосмосқа» сілтеме жасап.
Ұшыру штаттық режимде өтті
Зымыран №31 ұшыру кешенінен көкке көтерілген.
«Прогресс МС-35» кемесінің қажетті орбитаға шығарылуы, зымыранның үшінші сатысынан бөлінуі, сондай-ақ антенналары мен күн панельдерінің ашылуы штаттық режимде жүзеге асқан.
Кеме МКС-қа қашан жетеді?
Жүк кемесінің Халықаралық ғарыш станциясына дейінгі ұшуы 72 сағат 13 минутқа созылады. Осы уақыт аралығында «Прогресс МС-35» Жерді 49 рет айналып шығуы тиіс.
Кеменің МКС-тың Ресей сегментіндегі «Поиск» модулімен түйісуі 19 қыркүйекте сағат 18:47-де (Астана уақытымен) жоспарланған.
МКС-қа 2,5 тоннаға жуық жүк жеткізіледі
Кеме бортындағы жүктің жалпы массасы 2489 келі.
Оның ішінде:
- 1177 келі – экипаж бен станция жүйелеріне арналған құрғақ жүк;
- 842 келі – МКС-ты жанармаймен толықтыруға арналған отын;
- 420 келі – ауыз су;
- 50 келі – станция атмосферасын толықтыруға арналған оттегі.
Құрғақ жүктің арасында «Биополимер», «Вампир», «Виртуал», «Газоанализатор-ФС», «Теледроид» және «Ураган» ғылыми эксперименттеріне арналған жабдықтар бар.
Соның ішінде «Теледроид» тәжірибесі үшін арнайы экзоскелет те жіберілді. Оның көмегімен ғарышкерлер станцияға келесі жүк кемесімен жеткізу жоспарланған антропоморфты роботты қашықтан басқара алады.
