Ресей мен Украина энергетикалық нысандарға соққы жасамауға келісті – Трамп
Трамп бұл туралы Truth Social әлеуметтік желісіндегі парақшасында жазды
АҚШ Президенті Дональд Трамп Ресей мен Украина энергетикалық нысандарға өзара соққы жасамау жөнінде келісімге келгенін мәлімдеді, деп хабарлайды NewsMedia.kz.
Трамп бұл туралы Truth Social әлеуметтік желісіндегі парақшасында жазды.
Украина Ресейдің энергетикалық нысандарына соққы бермеуге келісті. Ресей де дәл осылай әрекет етуге келісті, – деп жазды АҚШ Президенті.
Алайда Трамп келісімнің нақты қашан күшіне енетінін, қанша уақытқа созылатынын және қандай нысандарды қамтитынын нақтылаған жоқ. Ресей билігі әзірге бұл мәлімдемеге қатысты ресми түсініктеме берген жоқ.
Зеленский не деді?
Украина Президенті Владимир Зеленский Киев Ресейдің маңызды инфрақұрылым нысандарына шабуыл жасамауға дайын екенін растады. Оның айтуынша, бұл міндеттеме Ресей тарапы да шабуылдарды тоқтатқан жағдайда орындалуы мүмкін.
Зеленский Мәскеудің келісімді орындауға дайын екеніне Киевтің күмәні бар екенін айтып, АҚШ тарапынан нақты кепілдіктер қажет екенін жеткізді.
Украина Президентінің пікірінше, энергетикалық және басқа да маңызды инфрақұрылымдарға соққы беруден өзара бас тарту бейбіт келісімге бастайтын алғашқы қадам болуы мүмкін.
Бұған дейін не айтылды?
8 тамызда Украина Қара теңіздегі мұнай тасымалымен байланысты танкерлер мен инфрақұрылымға соққы жасамауға міндеттеме алғаны хабарланған еді. Бұл нысандардың қатарында Қазақстан мұнайының экспортына қатысы бар инфрақұрылым да бар.
Bloomberg мәліметінше, бұл уағдаластық Киев пен АҚШ әкімшілігінің өкілдері арасындағы келіссөздерден кейін жасалған. Келісім санкцияға ілінбеген, ресейлік азаматтар мен компанияларға тиесілі емес және Ресей мұнайын тасымалдамайтын кемелерге қатысты болған.
Трамп Путинмен не талқылады?
9 қыркүйекте Дональд Трамп Ресей Президенті Владимир Путинмен телефон арқылы сөйлескенін хабарлаған. Тараптар Украинадағы жағдайды реттеу жолдарын, энергетикалық инфрақұрылымға жасалатын шабуылдарды өзара тоқтату мүмкіндігін, сондай-ақ тұтқындар алмасу мен гуманитарлық мәселелерді талқылаған.
Алайда сол телефон әңгімесінен кейін тараптар арасында нақты келісім жасалғаны туралы ресми мәлімдеме болған жоқ.
