Биыл Путин Қазақстанға келуі мүмкін
Нақты күндері әлі белгіленген жоқ, бірақ мұндай сапар болады
Ресей Президенті Владимир Путиннің Қазақстанға сапары 2026 жылға жоспарланып отыр. Бұл туралы Ресейдің Қазақстандағы елшісі Алексей Бородавкин «Россия 24» телеарнасына берген сұқбатында айтты, деп хабарлайды NewsMedia.kz.
Алексей Бородавкин 2025 жылғы қарашада Қазақстан Президенті Қасым-Жомарт Тоқаевтың Ресейге жасаған сапары «екі ел арасындағы ерекше достық қарым-қатынас аясында» өткенін еске салды. Оның сөзінше, Кремльдегі мемлекет басшыларының кездесуі бейресми форматта ұйымдастырылған.
Үш сағат бойы жеке-дара, Кремльдегі президентіміздің пәтерінде жабық жағдайда әңгімелесті. Сапардың жалпы атмосферасы айрықша жылы әрі достық сипатта өтті, – деді Алексей Бородавкин.
Елшінің айтуынша, биыл Ресей Президенті жауап ретінде Қазақстанға сапар жасауы мүмкін екенін айтқан.
Биыл президентіміздің сапары жоспарланып отыр. Нақты күндері әлі белгіленген жоқ, бірақ мұндай сапар болады. Басшыларымыздың алдында есеп беретін мәселелер жеткілікті деп ойлаймын, – деді ол.
Фото: Павел Бедняков/ТАСС
