Қазақстан Cirque du Soleil ұсынған OVO шоуының әлемдік гастрольдік турындағы 47-ел атанды

Енді OVO эстафетасын Алматы қабылдайды. Оңтүстік астанадағы көптен күткен премьераға санаулы күндер ғана қалды — 11 маусымда әлемді мойындатқан қойылым алғаш рет Almaty Arena сахнасында көрсетіледі. Ұйымдастырушылардың айтуынша, гастрольге деген қызығушылық өте жоғары, ал билет қоры күн сайын азайып келеді. Сондықтан шоуға қатысуды жоспарлаған көрермендерге билет алуды кейінге қалдырмауға кеңес беріледі.

Cirque du Soleil өкілдері OVO қойылымының әлемдік тарихы мен оның не себепті брендтің ең танымал жобаларының біріне айналғанын айтып берді. Сонымен қатар, шоу костюмдерінің қалай жасалатыны жөнінде де қызықты деректермен бөлісті. Бұл костюмдер бүгінде қойылымның басты символдарының біріне айналған.

Cirque du Soleil Қазақстанға 40 жылдан астам тарихында екінші рет келіп отыр. Осылайша, қазақстандық көрермендер тағы да әлемдік сахналарды бағындырған аты аңызға айналған шоуға куә болу мүмкіндігіне ие болды. Бүгінде бұл қойылым әлемнің түкпір-түкпірінде аншлагпен өтетін ең танымал жобалардың қатарында.

Бұл жолы халықаралық команда Қазақстанға OVO қойылымын алып келді. Шоу 2009 жылы Cirque du Soleil-дің 25 жылдығына арнайы дайындалып, компанияның мерейтойлық 25-ші қойылымы ретінде ұсынылған болатын. Алғашқы премьерасы Монреаль қаласында әйгілі Big Top цирк шатыры астында өтті. Кейін қойылым әлемдік турға шығып, уақыт өте келе Cirque du Soleil брендімен қатар аталатын культтік шоуға айналды.

Cirque du Soleil-дің ресми өкілі Жани Малленің айтуынша, OVO жылдар бойы әлемдік деңгейдегі мәдени феноменге айналған.

«OVO шоуы әлемді 17 жылдан бері аралап келеді. Осы уақыт ішінде қойылымды дүние жүзінде 10 миллионнан астам көрермен тамашалады. Cirque du Soleil-дің басты миссиясы — адамдардың қиялын оятып, ерекше эмоция сыйлау және шабыттандыру. Қазақстанның OVO гастрольдік картасына енуі — осы миссияның заңды жалғасы. Қазақстан OVO шоуы барған 47-ші ел болды», — деді ол.

Шоумен бірге әлем бойынша 25 елден келген 100-ден астам маман тұрақты түрде гастрольге шығады. OVO халықаралық құрамында Канада, АҚШ, Австралия, Жапония, Бразилия, Германия, Украина, Италия, Ұлыбритания, Моңғолия, Қытай және басқа да мемлекеттердің өкілдері бар. Мұндай ауқымды гастроль әр қала үшін үлкен логистикалық операция саналады. Себебі әр сапармен бірге сахналық декорациялар, күрделі конструкциялар, жүздеген костюмдер, техникалық жабдықтар мен арнайы қызметкерлер тобы бірге көшіп жүреді.

OVO атауы португал тілінен аударғанда «жұмыртқа» деген мағынаны білдіреді. Шоудың басты визуалды символына айналған алып жұмыртқаның ені — 8,5 метр, биіктігі — 7 метр. Ол сахнада көрермен шоу басталмай тұрып-ақ назар аударатын негізгі элементтердің біріне айналады. Бұл бейнені жасау кезінде суретшілер Стэнли Кубриктің культтік «2001: Ғарыш одиссеясы» фильмінен шабыт алған.

OVO көрерменді жәндіктер әлеміне жетелейді. Мұнда шегірткелер аспанда қалықтап, көбелектер сахна үстінде еркін самғайды, құмырсқалар мінсіз дәлдікпен өнер көрсетсе, өрмекшілер адам сенгісіз акробатикалық трюктер орындайды. Қанық түсті костюмдер, ауқымды декорациялар, динамикалық хореография мен ерекше музыка бірігіп, балаларды да, ересектерді де баурап алатын ғажайып атмосфера қалыптастырады.

Премьера қарсаңында ұйымдастырушылар шоу костюмдерінің жасалу ерекшеліктерін де таныстырды. OVO костюмдерінің авторы — суретші Лиз Вандаль. Ол образдарды жасау барысында жәндіктер әлемінен, футуристік суперқаһармандар эстетикасынан және әр дәуірдегі рыцарлық сауыттардан шабыт алған.

Дәл осы ерекше үйлесім шоу кейіпкерлерінің қайталанбас визуалды стилін қалыптастырды. Костюмдердің сегменттелген бөліктері жәндіктердің сауытын еске түсірсе, ұзартылған силуэттер мен айқын графикалық сызықтар заманауи суперқаһарман эстетикасын аңғартады. Дизайнерлер жәндіктерді сол күйінде көшіріп көрсетуді мақсат етпеген. Керісінше, олардың қозғалысын, мінезін және тірі әлемнің энергиясын жеткізуге басымдық берген.

Қанаттар, сауыттар мен көлемді элементтерді жасау үшін команда арнайы мата плиссировкасының ерекше технологияларын әзірлеген. Соның нәтижесінде костюмдер күрделі көпқабатты құрылымға ие болды. Шоу авторлары бұл образдарды «органикалық оригами» деп сипаттайды.

Ең күрделі костюмдердің бірі — шегірткелердің образы болған. Алғашқы кезеңде бір ғана костюмді жасауға шамамен 75 сағат уақыт кеткен.

Костюмдерді әзірлеу барысында конструкцияның қаттылығын сақтай отырып, әртістердің еркін қозғалуына мүмкіндік беретін түрлі материалдар мен технологиялар қолданылған.

Шығармашылық топқа шабыт берген негізгі бағыттардың қатарында француз дизайнері Пьер Карденнің геометриялық пішіндері мен айқын сызықтары, Ренессанс дәуірінің костюмдері және жапон дизайнері Issey Miyake ойлап тапқан тұрақты плиссировка техникасы бар.

Еске сала кетейік, OVO шоуының Алматыдағы қойылымдары 11–14 маусым аралығында Almaty Arena сахнасында өтеді. Билеттерді Астана, Алматы, www.cirquedusoleil.com/ovo сілтемелері арқылы сатып алуға болады. Қазақстандағы әлемдік гастрольді Freedom Events пен Asia Events компаниялары ұйымдастыруда.

Freedom Events басшысы Виктория Торгунакова:

«Мұндай деңгейдегі әлемдік жобалардың Қазақстанның мәдени өмірінің бір бөлігіне айналуы біз үшін өте маңызды. Біз мұндай іс-шаралар ұмытылмас әсер сыйлап, адамдарды шабыттандырып, Қазақстанды әлемдік мәдени картада таныта түседі деп сенеміз».

Freedom Events маркетинг директоры Санам Реваева:

«Осындай жобалар Қазақстанның әлемдік деңгейдегі ең ірі шоуларды қабылдай алатынын және халықаралық стандарттарға толық сай екенін көрсетеді».

Cirque du Soleil туралы

40 жылдан астам уақыт бойы Cirque du Soleil жанды шоу индустриясына жаңа көзқарас қалыптастырып келеді. Компания театрды, музыканы, акробатиканы және визуалды өнерді біріктіретін бірегей қойылымдарымен әлемге танылды. 1984 жылдан бері компанияның шоуларын алты құрлықтағы 86 елде 400 миллионнан астам көрермен тамашалаған. Бүгінде Cirque du Soleil құрамында 80-нен астам ұлт өкілінен құралған 4000-нан астам қызметкер жұмыс істейді, оның ішінде 1200 әртіс бар. 2026 жылы компания әлем бойынша бір уақытта 17 гастрольдік және стационарлық шоу ұсынуда.

Фото: дереккөз