Атырауда колонияда көз жұмған педофилдің өліміне қатысты сот басталады
Оның өліміне байланысты қылмыстық іс бойынша бес адам сот алдында жауап бермек
Атырауда кәмелетке толмағандарға қатысты аса ауыр қылмыс жасағаны үшін 25 жылға сотталған 51 жастағы ер адамның колониядағы өліміне байланысты қылмыстық іс бойынша сот басталады. Марқұмның өліміне қатысты бес адамға айып тағылған, деп хабарлайды NewsMedia.kz «Ақ Жайық» басылымына сілтеме жасап.
Алғашқы сот отырысы Атырау облысының қылмыстық істер жөніндегі мамандандырылған ауданаралық сотында 27 тамызға белгіленген.
Үш жыл бұрын 25 жылға сотталған
Қылмыстық істің тағы бір ерекшелігі – сот отырысын судья Зарема Хамидуллина қарайды. Осыдан үш жыл бұрын дәл осы судья қазір қайтыс болған ер адамға 25 жыл бас бостандығынан айыру жазасын тағайындаған.
2023 жылы ер адам Қылмыстық кодекстің 121-бабы 4-бөлігі және 124-бабы 4-бөлігі бойынша кінәлі деп танылған. Сот материалдарына сәйкес, іс кәмелетке толмағандардың жыныстық тиіспеушілігіне қарсы аса ауыр қылмыстарға қатысты болған.
Ол өгей әкесі болған бес және сегіз жастағы екі қызға қатысты қылмыс жасағаны үшін сотталған.
Колонияда жанжалдан кейін қайтыс болды
51 жастағы ер адам жазасын Атыраудағы №15 түзеу мекемесінде өтеп жатқан.
2026 жылғы 22 наурызда колонияда сотталғандар арасында жанжал болған. Осы оқиғадан кейін ер адам көз жұмды.
Оның өліміне байланысты қылмыстық іс бойынша бес адам сот алдында жауап бермек. Сот барысында жанжалдың қалай болғаны, оның неден басталғаны және әр сотталушының оқиғаға қатысы қандай екені анықталуы тиіс.
Жаназасына жүздеген адам жиналған
Бұған дейін марқұмның балаларға қатысты ауыр қылмыс жасағаны үшін сотталғанын білмеген жүздеген адамның оның жаназасына қатысқаны хабарланған еді.
25 наурызда, қайтыс болғаннан үш күн өткен соң, онымен Атыраудағы орталық «Иманғали» мешітінде қоштасу рәсімі өткен. Куәгерлердің айтуынша, жаназаға жүздеген адам жиналған.
Кейін қаладағы банкет залдарының бірінде ас беріліп, марқұмның денесі туған жері – Жылыой ауданының Құлсары қаласына жеткізіліп, жерленген.
Дереккөздердің мәліметінше, қаза тапқан Дабыл Жәрдемұлы Атырау қаласының әкімі Шәкір Кейкиннің алыс туысы болған. Алайда ол әкімнің туған інісі емес. Осыған байланысты олардың тегі мен әкесінің аты да әртүрлі.
