Қазақстанның жаңа Үкіметі: төрт министр ауысты, қалғаны қызметінде қалды

Қазақстанда жаңа Конституцияға сәйкес Үкіметтің жаңа құрамы жасақталды. Премьер-министр Олжас Бектенов өз қызметінде қалды. Кабинеттегі 25 министрлік лауазымның төртеуінде ғана ауыс-түйіс болды, деп хбарлайды NewsMedia.kz.

Бұл Үкімет құрамының шамамен 16 пайызы жаңарғанын білдіреді.

Үкімет неге отставкаға кетті?

28 тамызда Қазақстан Үкіметі отставкаға кеткен болатын. Бұл бір палаталы Парламент – Құрылтай депутаттарының сайлауынан кейін жүзеге асты.

Жаңа Конституцияға сәйкес, 1 шілдеден бастап елімізде жаңа саяси жүйе іске қосылды. Мәселен, Мәжіліс пен Сенат таратылып, олардың орнына бір палаталы Құрылтай құрылды. Депутаттар сайланғаннан кейін Үкіметтің де отставкаға кетуі Конституция талаптарына сәйкес жүзеге асырылды.

Премьер-министр және орынбасарлары

Олжас Бектенов Премьер-министр қызметін сақтап қалды. Ол бұл қызметке алғаш рет 2024 жылғы ақпанда тағайындалған, ал 2026 жылғы тамызда қайта тағайындалды.

Премьер-министрдің алты орынбасарының бесеуі өз қызметінде қалды.

Олар:

• Нұрлыбек Налибаев – Премьер-министрдің бірінші орынбасары;
• Ғалымжан Қойшыбаев – Премьер-министрдің орынбасары әрі Үкімет аппаратының басшысы;
• Қанат Бозымбаев – Премьер-министрдің орынбасары;
• Серік Жұманғарин – Премьер-министрдің орынбасары – Ұлттық экономика министрі;
• Жаслан Мәдиев – Премьер-министрдің орынбасары – Жасанды интеллект және цифрлық даму министрі.

Ал бұған дейін Премьер-министрдің алтыншы орынбасары болған Аида Балаева жақында Қауіпсіздік Кеңесі төрағасының орынбасары қызметіне тағайындалған. Жаңа Үкіметте Мәдениет және ақпарат министрлігіне басқа басшы келді, алайда жаңа министр Премьер-министрдің орынбасары қызметін алған жоқ.

Төрт министр ауысты

Жаңа Үкімет құрамындағы негізгі өзгеріс төрт министрлікке қатысты болды.

Сыртқы істер министрі болып Мұхтар Тілеуберді тағайындалды. 58 жастағы дипломат бұған дейін үш жыл бойы Сыртқы істер министрлігін басқарған. Кейін Қазақстанның Аустриядағы Төтенше және өкілетті елшісі қызметін атқарды.

Экология және табиғи ресурстар министрлігін Әлібек Қуантыров басқарады. Ол бұған дейін Ұлттық экономика министрі болған, кейін KAZENERGY қауымдастығының басшысы болды. Одан соң Сыртқы істер министрінің орынбасары қызметін атқарды.

Мәдениет және ақпарат министрі болып Арман Қырықбаев тағайындалды. Ол бұған дейін Алматы әкімінің орынбасары, Президент Әкімшілігінде қызметкер және Мемлекет басшысының ішкі саясат пен коммуникациялар жөніндегі көмекшісі болған.

Төтенше жағдайлар министрлігін Мұрат Мұханов басқарады. 41 жастағы жаңа министр бұған дейін Төтенше жағдайлар министрлігі аппаратының жетекшісі болған.

Күштік құрылымдарда өзгеріс жоқ

Жаңа Үкімет құрамында күштік блок басшылары түгелдей қызметтерінде қалды.

Ішкі істер министрі болып Ержан Саденов қайта тағайындалды. Ол бұл қызметті 2022 жылдың қаңтарынан бері атқарып келеді.

Қорғаныс министрі болып Даурен Қосанов та қалды. Ол Қорғаныс министрлігін 2025 жылғы тамыздан бері басқарып келеді.

Қалған министрлер де қызметінде қалды

Әділет министрі Ерлан Сәрсембаев, Көлік министрі Нұрлан Сауранбаев, Энергетика министрі Ерлан Ақкенженов, Өнеркәсіп және құрылыс министрі Ерсайын Нағаспаев өз лауазымдарын сақтап қалды.

Сондай-ақ Оқу-ағарту министрі Жұлдыз Сүлейменова, Сауда және интеграция министрі Арман Шаққалиев, Су ресурстары және ирригация министрі Нұржан Нұржігітов, Денсаулық сақтау министрі Ақмарал Әлназарова, Ауыл шаруашылығы министрі Айдарбек Сапаров, Еңбек және халықты әлеуметтік қорғау министрі Асқарбек Ертаев, Қаржы министрі Мәди Тәкиев, Ғылым және жоғары білім министрі Саясат Нұрбек және Туризм және спорт министрі Ербол Мырзабосынов қызметтерін жалғастырады.

Осылайша, Үкіметтің жаңа құрамындағы өзгеріс ауқымды кадрлық ауыс-түйіске ұласқан жоқ. 25 министрлік лауазымның төртеуі ғана жаңарып, негізгі экономикалық, әлеуметтік және күштік блоктардың басым бөлігі бұрынғы басшыларға қалдырылды.

Бұл ретте жаңа құрам Үкіметтің толық қайта жасақталуынан гөрі, жекелеген бағыттарға жауапты министрліктердегі кадрлық жаңарумен сипатталады.