Алматыда Қала күні: қандай іс-шаралар өтіп жатыр

Алматыда Қала күніне арналған негізгі мерекелік іс-шаралар болып жатыр. Қаланың орталығы мен аудандарында концерттер, фестивальдер, көрмелер және балаларға арналған бағдарламалар ұйымдастырылды, деп хабарлайды NewsMedia.kz.

Alma Qala Fest

Мерекелік іс-шаралардың негізгі алаңдарының бірі – Панфилов пен Жібек жолы көшелерінің жаяу жүргіншілерге арналған бөлігі. Мұнда екі күнге жоспарланған Alma Qala Fest фестивалі өтіп жатыр.

Фестивальге 50-ге жуық шаруашылық қатысып, алманың түрлі сұрыптарынан 200 тоннадан астам өнім ұсынды.

Фестиваль тек жәрмеңкемен шектелмейді. Мұнда өнер, спорт, экология, цифрлық технологиялар және ұлттық дәстүрлерге арналған алаңдар жұмыс істейді. Балаларға аниматорлар, батут, аквагрим, сабын көпіршіктері шоуы және ғылыми қойылымдар ұйымдастырылған.

Гастрономиялық алаңда Алматының 25 мейрамханасы өз өнімдерін ұсынуда. Сонымен қатар заманауи қазақстандық картиналар мен отандық киноның алтын қорындағы фильмдер көрсетіліп, түсірілім топтарымен кездесулер өтеді.

Абай алаңы

Абай алаңында 19-20 қыркүйек күндері Otbasy Fest мерекелік бағдарламасы өтуде.

Мұнда «Алма аймағы», «Шеберлер қалашығы», балалар алаңы, AI & Robot Zone, қолөнер ойындары аймағы және фудкорт жұмыс істейді.

19 қыркүйекте осы алаңда Алматы қаласының «Құрметті азаматы» атағын табыстау рәсімі өтті.

Кешкі бағдарламада «Сазген сазы» фольклорлық-этнографиялық ансамблі, Қазақ мемлекеттік циркінің әртістері, ASU тобы және «Алатау» дәстүрлі өнер театры өнер көрсетті. Кеш Ratovich концерті және Best of Ne Prosto Orchestra бағдарламасымен жалғасады.

Астана алаңы

Қаланың негізгі музыкалық шаралары Астана алаңында ұйымдастырылды.

19 қыркүйекте мұнда «Сенім» вокалдық хоры, «Отырар сазы» академиялық оркестрі, «Рабат» ансамблі, «Астра» тобы, Muzart Life және басқа да өнерпаздар қатысқан концерт өтті.

Кешке Almaty Vibes музыкалық фестивалі басталады. Сахнаға Мақпал Жүнісова, Мирас Жүгінусов, Kalifarniya, Alpha, Айдана Меденова, Жандос Қаржаубай және басқа да орындаушылар шығады.

Сайран көлінің жағалауы

Мерекелік шаралар қаланың орталығымен шектелмейді. Алмалы ауданында Сайран көлінің шығыс жағалауында концерт ұйымдастырылды.

Келушілер үшін спорттық және балалар алаңдары, қолданбалы өнер көрмесі мен фуд-зона жұмыс істейді.

Қаланың барлық ауданында

Қала күніне арналған бағдарламалар Алматының барлық ауданында өтуде.

Әуезов ауданында шаралар Н. Сац атындағы театр алдындағы алаңда, Бостандық ауданында Flow Park-та, Жетісу ауданында ипподромда ұйымдастырылған.

Медеу ауданында мереке Терренкурда, Түрксіб ауданында С. Сейфуллин атындағы саябақ пен Сауранбаев көшесінде өтеді. Алатау ауданында шаралар «Алатау» дәстүрлі өнер театры алдындағы алаңда ұйымдастырылды.

Наурызбай ауданында көшпелі цирк бағдарламасы, мерекелік концерт және ашық аспан астындағы кино көрсетілімдері жоспарланған.

Алматы тарихы мультимедиялық шоуда көрсетіледі

20:00-ден 22:00-ге дейін Астана алаңындағы ғимараттардың қасбеттері мультимедиялық қойылымның бір бөлігіне айналады.

Жарық проекциялары арқылы Алматы тарихының әр кезеңі көрсетіледі.

Мерекелік бағдарлама 20 қыркүйекте де жалғасады

Қала күніне арналған негізгі шаралар 20 қыркүйек, жексенбі күні де жалғасады.

Абай алаңында «Алматы, менің Алматым», «Алматы әуендері» және «Жырлайды Алматы!» концерттері өтеді. Балалар үшін қалада алғаш рет халықаралық D Billions жобасы өнер көрсетеді.

Ал Терренкурда Қазақстаннан және шетелден келген суретшілердің қатысуымен көше өнері фестивалі ұйымдастырылады.