Елордада қоғамдық көлік жолақтары кеңейтіледі
Астанада қоғамдық көлікке арналған арнайы жолақтар желісін айтарлықтай кеңейту жоспарланып отыр — қазіргі 130 шақырымнан 240 шақырымға дейін. Бұл туралы Жол қозғалысын ұйымдастыру орталығының директоры Марат Садуов мәлімдеді.
Оның айтуынша, қазір қала көшелерінде 130 шақырым Bus Lane белгіленген, алайда алдағы уақытта олардың ұзындығын екі есеге жуық арттыру көзделіп отыр.
«Кейбір учаскелерде қозғалыс жылдамдығының артқанын байқап отырмыз. Дегенмен Bus Lane жолақтарының үзік-үзік болуы салдарынан әзірге оның айтарлықтай айқын әсерін көріп отырған жоқпыз», – деді Садуов мәслихат отырысында.
Сондай-ақ ол қазіргі уақытта автобус жолақтарына заңсыз шығатын жүргізушілерді бақылаудың тиімді тетіктері жеткіліксіз екенін атап өтті.
«Біз аялдама қалташаларын алып тастағаннан кейін, көптеген жеке көлік жүргізушілері Bus Lane жолақтарына кіріп, сол жерде қозғалып жүр. Егер автобус жолақтарынан тәртіп бұзушыларды толықтай алып тастасақ, тиімділік 10 пайыздан 50 пайызға дейін артады. Қазірдің өзінде осы қалташалар маңында жол-көлік оқиғаларының азайғанын байқап отырмыз, себебі автобустар күрделі маневрлер жасамайтын болды», – деп атап өтті ол.
