«Кішкентай қызы көріп отырған»: ақтөбелік әйел TikTok эфирінде интимдік өмірін ашық айтқан (ВИДЕО)
Видеода әйелдің бірнеше ер адаммен бірге алкогольдік ішімдік ішіп отырғаны көрінеді
Ақтөбеде TikTok желісіндегі тікелей эфир кезінде балағат сөздер айтып, интимдік өмірін ашық талқылаған 32 жастағы әйел әкімшілік жауапкершілікке тартылды, деп хабарлайды NewsMedia.kz.
Әлеуметтік желіде тараған тікелей эфир қоғамның назарын аударған. Видеода әйелдің бірнеше ер адаммен бірге алкогольдік ішімдік ішіп отырғаны көрінеді. Эфир барысында ол көрермендер алдында интимдік өмірі туралы ашық сөйлесіп, былапыт сөздер қолданған.
Тікелей эфирді оның кішкентай қызы да көріп отырған. Қыз анасына хабарлама жазып, эфирді тоқтатуды өтінген және жағдайдан ұялып отырғанын жеткізген. Әйелдің таныстары да баласының эфирді көріп отырғанын ескерткен.
Алайда әйел ескертулерге қарамастан тікелей эфирді жалғастырған.
Кейін бұл бейнежазба полицияның назарына түскен. Ақтөбе облысының полиция департаменті жүргізген тексеру нәтижесінде эфир авторының жеке басы анықталып, оған қатысты әкімшілік материалдар жиналған.
Құқық қорғау органдары әйелдің әрекетін ұсақ бұзақылық ретінде бағалаған. Сонымен қатар оған кәмелетке толмаған баласын тәрбиелеу жөніндегі ата-аналық міндеттерін тиісінше орындамағаны үшін де жауапкершілік қаралған.
Сот шешімімен Мөлдір Әуезоваға 20 АЕК, яғни 86 500 теңге көлемінде әкімшілік айыппұл салынды.
Полиция әлеуметтік желілердің көпшілікке қолжетімді қоғамдық кеңістік екенін еске салды. Сондықтан интернеттегі әрекеттер де Қазақстан заңнамасының талаптарына сәйкес бағалануы мүмкін.
Оқиға әлеуметтік желідегі еркіндік пен жауапкершіліктің шекарасы туралы мәселені тағы бір мәрте көтерді.
